БЕЛОРУССИЯ УНИВЕРСИТЕТИ, Белоруссия давлат ун-ти — 1921 й. Минск ш. да ташкил этилган. Ун-т таркибида биол., геогр., тарих, журналистика, механика-мат., амалий мат. ва информатика, радиофизика ва электроника, физика, фалсафа-иқтисод, кимё, юридик, халқаро муносабатлар, хорижий фуқаролар учун тайёрлов, олий ўқув юртлари ўқитувчилари малакасини ошириш, амалий мат. ва ЭҲМ бўйича малака ошириш ф-тлари, шунингдек бизнес ва технологиялар ахбороти махсус ф-ти бор; 14,4 минг талаба ўқийди, 121 кафедрада 1410 ўқитувчи, жумладан 190 проф. ва фан д-ри, 800 дан ортиқ доцент ва фан номзоди ишлайди. Сиртқи бўлими мавжуд. 1927 й. дан аспирантура, 1988 й. дан докторантура ишлайди. Ун-тда 3 и. т. институти, нашриёт, ҳисоблаш-ахборот ва илмий-инженерлик марказлари, асосий кутубхона, 3 музей, «Ҳемыслица» илмийтажриба хўжалиги, «Нарочь» биология ст-яси, «Западная Березина» илмини. ч. географик база бор.