БАРАНОВСКИЙ Евгений Николаевич [1907.15(28).3, Оренбург – 1981.5.9, Москва] — балет артиста, балетмейстер. Ўзбекистонда хизмат кўрсатган санъат арбоби (1955). Дастлаб циркда акробатлик қилган. 1929 — 39 й. ларда Тошкент опера ва балет театрида раққос, айни вақтда Е. Обуховадан мумтоз рақс, Уста Олим Комилов, М. Турғунбоевадан ўзбек рақсини ўрганган. 1939 — 48 й. ларда Навоий театри балетмейстери. Барановский Ўзбек Давлат филармонияси (1949 — 56) ва Муқимий театрида (1956 — 68) бош балетмейстер. Бир қанча балет ва мусиқали драмалар рақсларини саҳналаштирган. Унинг «Балиқчи», «Оқ олтин», «Мирзачўл», «Пахтакор» каби эстрада рақслари хам машҳур. 1939 — 43 й. лар М. Турғунбоева б-н ҳамкорликда «Пахта», «Хоразм рақси», «Аскарлар», «Танавор» каби рақсларни яратган.