BAYONQULIXON (Buyonqulixon) Surgatu oʻgʻli (? — 1358) — Chigʻatoy ulusi xoni (1348 — 58). Chigʻatoylardan. Davlat ishlarini aslida uning nomidan amir Qazagʻon boshqargan. 1358-y. qishda Qazagʻon fitnachilar tomonidan oʻldirilgach, uning oʻgʻli amir Abdulla B. ga qarshi Hisor hokimi Bayon sulduz va Kesh (Shahrisabz) hokimi Hoji Barlos bilan birgalikda bosh koʻtargan. Samarqandga yaqin yerda boʻlgan jangda Bayonqulixon qoʻlga olinib, qatl qilingan.