БАЛАНДЛИК КАСАЛЛИГИ — организмнинг касаллик ҳолати; сийрак ҳаволи жойларда нафас олинганда рўй бериб, бунга асосан қонда кислород етишмаслиги (гипоксия) сабаб бўлади. Жуда баланд ерларга кўтарилганда кузатилади. Баландлик касаллигига айрим аъзоларнинг, хусусан марказий нерв системасининг издан чиқиши сабаб бўлади. Баландлик касаллиги бир зумда рўй бериб, нафас қисиши, юрак ўйнаши, бош айланиши, оғриши, кўнгил айниши, қайт қилиш, бурун қонаши ва б. руҳий ўзгаришлар, шунингдек оғирроқ ҳолларда ҳушдан кетиш мумкин. Баландлик касаллиги тоғ касаллигидан фарқ қилади. Д а в о с и. Беморни баландликдан тушириб, тинч қўйилади, юрак дорилари, иссиқ чой, кофе, зарурият бўлса кислород берилади. Баландлик касаллигининг олдини олишда юқорига кўтарилишни машқ қилиш, кислородли асбоблардан фойдаланиш, энг муҳими иқлимга мослашиш лозим.