ЯНУС — Рим мифологиясида эшик, киришчиқиш, кейинчалик — ҳар қандай ишнинг боши (шу жумладан, инсон ҳаётининг ҳам бошланиши) ҳамда битимлар ва иттифоқлар худоси. Янус қасри дарвозасини уруш эълон қилинганда очишган (қўшинлар жангга шу дарвозадан чиққан) ва сулҳ тузилгандан сўнг ёпишган. Йилнинг 1ойи — январь унга бағишланган (Я. шарафига байрам 9 янв. да нишонланган). Турли томонга қараб турган 2 қиёфада (кекса ва ёш кўринишида) тасвирланган. Бунда ўтмишгина эмас, балки келажак ҳам Янусга маълум, деган фикр ўз ифодасини топган. Кўчма маънода — «икки қиёфали Янус» — иккиюзламачи одам.