ЯНГИҚАЛЪА ҚАБРИСТОНИ — мил. ав. 2-минг йилликнинг 2-ярмига оид қадимий қабристон. Ашхобод вилоятининг Гўктепа туманидаги Янгиқалъа қишлоғида. Қабристонни Янгиқалъа мактаб ўқувчилари (1951 йил) топган, археолог А. Ф. Ганялин текширган. Олтита эркак ва битта аёл қабри очилган. Жасадлар чап ёнбоши билан ғужанак қилиб дафн этилган. Жасаднинг бош ёки оёқ томонига лойдан тайёрланган идишлар қўйилган. Қабрлардан ҳаммаси бўлиб лойдан ишланган 17 та турли шакл ва ҳажмдаги идиш, шунингдек, жез узук, тўғноғич, мунчоқ ва бошқалар тақинчоқлар, аёлларнинг лойдан ишланган ҳайкалчалари топилган.