«ЯНГИ ГЛОБАЛ ТЕКТОНИКА», литосфера плиталари тектоникаси — Ер литосферасини ҳаракатдаги блокплиталар системасидан иборат деб қаровчи энг янги геологик гипотеза. «Янги глобал тектоника»нинг асосий принциплари шотланд геологи А. Холмс томонидан белгиланиб, унда О. Ампферернинг Ер пўсти остидаги оқим гипотезаси, Ж. Жолининг радиоген гипотезаси ва А. Вегенернинг материкларнинг сузиб юриши тўғрисидаги гипотезаларини бирлаштирди. «Янги глобал тектоника»га мувофиқ, литосфера кам ёпишқоқпикка эга бўлган астеносфера устида бир қанча плиталарга бўлинган. Плиталарнинг чегараси энг юқори тектоник, сейсмик ва вулканли фаол зоналардир. Ушбу чегаралар бўйлаб плиталарнинг бир-бирига нисбатан қарама-қарши томонга силжиши, бири иккинчисининг устига ёки остига силжиши ёки горизонтал силжиши содир бўлади. Океан ўрталиқ тизмаларининг рифт зоналарида плиталар бир-биридан ажралади ва оралиқ жой астеносферадан кўтарилиб чиққан базальтли магма билан тўлади. Чуқур сув ости новларида бир плита иккинчи плитанинг остига сурилиб кириб, мантия томонидан ютиб юборилади. Йирик плиталар қаторига Тинч океан, Евросиё, Шим. Америка, Жанубий Америка, Африка, ҲиндистонАвстралия, Антарктида плиталари киради. Астеносфера бўйлаб ҳаракатдаги литосфера плиталари ўзининг қаттиқлиги ва яхлитлилигига эга. Астеносферадаги конвекцион оқимлар плиталарни ўрталиқ тизмалардан четга томон суриб олиб кетади, ороллар ёйи ва материклар чеккалари бўйлаб эса океан ости Ер пўсти плиталари,материклар Ер пўсти остига кириб боради. Янги далилларга таянган «Янги глобал тектоника» концепцияси кенг оммалашди. Айни вақтда конвекция механизми, океан ости Ер пўстининг континентлар остига кириб бориши масаласида жиддий эътирозлар ҳам мавжуд. Плиталар ўзаро тўқнашган жойларда бурмали иншоотлар пайдо бўлади.