ЯГАНА, яганалаш — экинларнинг қалинлигини меъёрдаги зичликка келтириш учун сийраклаш; қатордаги ёки ўсимлик уяларидаги ортиқча (касалланган, яхши авж олмаган) ниҳолларни олиб ташлаш. Ўсимликнинг жадал ривожланиши ва мўл ҳосил тўплашини таъминлайдиган агротехник тадбирлардан бири. Вегетация даврининг бошида ўсимликларнинг ўсиб, ривожланишига қулай шароит яратиш ва сифатли ҳосил олиш мақсадларида ўтказилади. Барча чопиқ қилинадиган экинлар (ғўза, қанд лавлаги, дон учун экилган маккажўхори, сабзи, шолғом, кунгабоқар ва бошқалар) Ягана қилинади. Ягана культиваторлар, махсус Ягана лаш машиналари ёрдамида ёки қўлда бажарилади. Ягана ғўза, қанд лавлаги 2 чинбарг чиқарганидан сўнг, сабзавот экинларида илдизмева ҳосил бўлаётган давр бошида ўтказилади. Ғўза қатор ораси 60 см қилиб экилганда ҳар бир метрда 8—9 туп кўчат қолдирилиши, илдизмевалиларда Яганадан кейин туп ораси шолғомда 5—7 см, сабзида 3—5 см бўлиши керак; қовоқ, қовунтарвузда ҳар уяда бир тупдан (Я. чопиқ пайтида бир йўла ўтказилади) ниҳол қолдирилади. Ягана кечикиб ўтказилса, тупроқдан озиқ моддалар кўп йўқотилади ва тупроқ нами камайиб, ўсимликлар бир-бирини сиқиб қўяди, илдизлари чалкашиб ўсиши секинлашади, ҳосилдорлик пасаяди, баъзан экинлар нобуд бўлади.