УРУҒЛИ МЕВА ДАРАХТЛАРИ — раънодошлар оиласига мансуб уруғли мева берадиган ўсимликлар. Буларга олма, беҳи, нок, дўлана, мушмула ва б. киради. Уруғли мева дарахтлари бир нечта тур ва турхилларни ўз ичига олади. Олма, нокнинг минглаб навлари бор. Ўзбекистоннинг ҳамма вилоятларида экилади. Данакли мева дарахтларига нисбатан кечроқ ҳосилга киради, лекин кўп умр кўради, совуққа чидамли, меваси узоқ сақланади.