УЛЬТРАМЕТАМОРФИЗМ (ультра… ва метаморфизм) — мигматитлар ҳосил бўлиши кузатиладиган регионал метаморфизм. «Ультраметаморфизм» термини швед геологи П. Хольмквист томонидан (1909) киритилган. Ультраметаморфизм натижасида метаморфик жинслар (гнейс, пироксенплагиоклазли сланец ва амфиболитлар) такрорий метаморфизмга учрайди, 650—800° тра ва 4—10 кбар литостатик босимда гранитланиш рўй беради. Бунда пироксенлар ўрнини шох алдамчилар, унинг ўрнини эса биотит, плагиоклазкалийли дала шпати, кварц олади ва жинсларнинг умумий кимёвий таркиби ўзгаради. Ультраметаморфизм жараёнида мигматитлар ҳосил қиладиган жинсларнинг гранитланиши анатексис (жинсларнинг иссикдан эриши) нинг кучайиши ва уларнинг учувчи компонентларга тўйинган нррдон магма б-н ўрин алмашиши натижасида содир бўлади. Ультраметаморфизм геосинклиналь ҳаракатчан зоналар тараққиётининг орогеник босқичида учрайди.