УКЛОНСКИЙ Александр Сергеевич (1888.5.11, Гомель ш. — 1972.16.2, Тошкент) — геолог олим, Ўзбекистон ФА акад. (1943). Геол. минералогия фанлари д-ри (1920), проф. (1920), Ўзбекистонда хизмат кўрсатган фан арбоби. Москва ун-тини тугатган (1914). ТошДУ ва ТошПИда минералогия кафедраларини ва Ўзбекистон ФА Геология ва геофизика ин-тида минералогия ва геокимё бўлимларини ташкил этган. Тошкентда минералоггеокимёчилар мактабини яратган. У. Ўрта Осиё, Ўзбекистонда олтингугурт конлари минералогияси ва жойлашиш қонуниятларини ўрганган (1928—40), минералларнинг геокимёвий таснифини тузиб, дарслик ёзган (1940). Ўзбекистондаги оқар сувларнинг изотоп таркибини текширган. Геокимё фанига «протокристалл», «изотоп», «изобара», «параэлементлар» каби янги назарий тушунчалар киритган. У. Ўзбекистонда минералогия ва геокимё фанлари ривожига салмокли ҳисса қўшган. Янги топилган минерал уклонсковит деб аталган.