ЦИТОКИМЁ (цито… ва кимё) — цитологиянинг бўлими, ҳужайра тузилмаларининг кимёвий таркиби, ҳужайрада кимёвий бирикмаларнинг синтезланиши, тақсимланиши ва фаоллигини, хужайра функциясига караб уларнинг ўзгаришини ўрганади. Цитокимё соҳасидаги тадқиқотлар 19-а. нинг ўрталаридан 20-а. ўрталаригача айниқса жадал ривожланган. Цитокимё тадқиқотлари ҳужайра таркибий қисмларининг муайян бўёқлар билан бўялиши ва, аксинча, бошқа бўёқлар таъсир қилмаслигига асосланган. Нуклеин кислоталарининг ирсиятдаги аҳамиятини тушунтириб берилиши, оқсил молекулалари микдорий ўзгаришларининг ҳужайра функционал фаоллигига боғлиқлиги аниқланиши, ҳужайра циклини ўрганиш Цитокимёнинг энг катта ютукдаридир. Иммуноцитокимё, электрон микроскопик цитокимё Ц. нинг энг истикболли соҳалари ҳисобланади. Тўқима структураларини Цитокимё методи ёрдамида ўрганиш гистокимё дейилади.