ЛЮМЬЕР (Lumiere) Луи Жан (1864.5.10, Безансон — 1948.6.6, Бандоль) — француз кинематография ихтирочиси. Француз ФА аъзоси (1919). Саноат мактабини тугатган, отасига қарашли фотоматериаллар ф-касида ишлаган. 1895 й. да акаси Огюст (1862 — 1954) билан бирга «ҳаракатланувчи фотографиялар»ни суратга олиш ва экранга проекциялаш аппарати (кинематограф) тузилмасини ишлаб чиққан. Шу аппарати билан суратга олинган кино-программани биринчи марта Парижда 1895 й. дек. да намойиш этган. 1898 й. дан кинотехника билан шуғулланган. Люмьер ҳажмий ва рангли кинога олиш ва намойиш қилишни тадқиқ килган. Францияда ҳар йили энг яхши хужжатли фильм учун Люмьер номли мукофот таъсис этилган.