ЛАУЭ (Laue) Макс Феликс Теодор фон (1879.9.10, Пфаффендорф, Кобленц яқинида — 1960.24.4, Берлин) — немис физиги. Берлин ун-тини тугатган (1904). Илмий ишлари оптика, кристаллофизика, ўта ўтказувчанлик, нисбийлик назарияси, квант назария, атом физикаси, қаттиқ жисмлар физикаси ва б. га оид. Кристалларда рентген нурлари интерференцияси назариясини яратиб, бу нурлар учун кристаллардан дифракцион панжара сифатида фойдаланишни таклиф қилган, кристалларда рентген нурларининг дифракцион назариясини ишлаб чиққан (1912). Унинг раҳбарлигида биринчи марта лауэграмма олинган ва бу билан рентген структура анализига асос солинган. Нобель мукофоти лауреати (1914).