ФЕЛЛИНИ Федерико (1920.20.1, Римини — 1993) — Италия кинорежиссёри. 1937 й. дан Флоренция, кейинроқ Римда журналист сифатида фаолият юритган. Шунингдек, суғурта агенти, витрина безовчи, карикатурачирассом, репортёр ҳам бўлган. 1942 й. дан тижорат учун ишланган комедия ва мелодрамаларга сценарий ёзган. Р. Росселинининг «Рим—очиқ шаҳар», «Пайза» фильмлари яратилишида қатнашган. Неореализм анъаналаридан фойдаланган ҳолда ўзининг ёрқин кинематографик услубини яратди («Оқ шайх», «Онасининг болалари», «Йўл», «Ширин ҳаёт» ва б.). «Саккиз ярим» номли янги йўналишдаги фильмида реал образлар оқимини қаҳрамонларнинг субъектив қарашлари билан бирлаштирди. «Рим», «Амаркор», «Оркестр репетицияси», «Интервью», «Ойнинг овози» каби фильмлари Италиянинг тарихий тақдири, миллий минталитет масалаларига бағишланди. Феллини ижодига бағишланган «Чао, Федерико» фильми ишланган (реж. Г. Бахман, 1969).