ФАЁЗОВ Ваҳобжон Собирович (1912.8.10, Қўқон —1974.2.8, Урганч) — актёр, реж., хонанда (лирик тенор). Ўзбекистон халқ артисти (1950). Ўз фаолиятини 1932 й. Кўқон темирйўлчилар клуби қошидаги ишчилар театрида бошлаган. 1933—34 й. лар Қўқон театрида, 1934 й. дан Огаҳий номидаги Хоразм театрида ишлаган. Ғариб (М. Юнусов, С. Самандаров, «Ошиқ Ғариб ва Шоҳсанам»), Тоҳир (С. Абдулла, «Тоҳир ва Зуҳра»), Жалолиддин (М. Шайхзода, «Жалолиддин Мангуберди»), Мажнун, Фархрд (Хуршид, «Лайли ва Мажнун», «Фарҳод ва Ширин»), Ҳусайн Бойқаро (Уйғун, И. Султон, «Алишер Навоий»), Ғофир (Ҳамза, «Бой ила хизматчи»), Тошболта (Ҳ. Ғулом, «Тошболта ошиқ»), Мулладўст (Ҳамза, «Майсаранинг иши»), Аброр (Уйгун, «Парвона»), Нурбобо (И. Султон, «Номаълум киши»), Мирзакаримбой (Ойбек, «Қутлуғ қон») образларини яратган. Фаёзов ижоди хиссиётлар тўлқини, буюк инсоний фазилатларни моҳирона оча олиши билан эътиборли бўлиб, образлари ҳаётийлиги, юксак ижро савияси билан ажралиб туради. Хонанда сифатида «Феруз 1,2», «Хоразм Чоргоҳи», «Дугоҳ», «Ёрим берган оқ рўмол», «Faрибдурмен» каби ашулаларни баланд авжда чиройли ва ёқимли айтган. Реж. сифатида «Бой ила хизматчи», «Паранжи сирлари» (Ҳамза), «Шоҳи сўзана» (А. Қаҳҳрр), «Макр ва мухаббат» (Ф. Шиллер), «Муқимий» (С. Абдулла) каби спектаклларни саҳналаштирган. Матёқуб Раҳимов, Комилжон Отаниёзов ва б. унинг шогирдларидир.