ФАРА (франц. phare — маёқ, маёқ чироғи) — транспорт воситаси (автомобиль, трактор ва б.) ҳамда ўзиюрар машиналарнинг йўлни, иш бажарилаётган жой ва б. ни ёритиш учун мўлжалланган электр асбоби. Асосий қисмлари — штамплаб ясалган корпус ва оптик элементлар. Оптик элемент юпқа алюминий қатлами суркалган пўлат қайтаргич, бир ёки икки толали чўғланма лампадан иборат ёритиш манбаи ва ёруғликни сочиб берадиган ғадирбудир шишадан иборат. Ёруғлик қайтаргич фокусида жойлашган қувватлироқ толадан тарқаладиган нур узоқни ёритади, кичикроқ қувватли иккинчи тола фокусдан юқорироқда чап томонда жойлашган бўлиб, яқинни ёритиш учун мўлжалланади. Йод лампали Фаралар кенг тарқалган. Бундай лампаларнинг колбасига йод буғлари бўлган сийраклаштирилган газ тўлдирилади. Ҳар бир транспорт воситасига камида бир жуфт Ф. ўрнатилади. Улар машинанинг бўйлама ўқига нисбатан симметрик тарзда жойлаштирилади. Баъзи машиналарда туманга қарши иккита қўшимча Ф. ҳам ўрнатилиши мумкин. Махсус машиналар (ўт ўчириш машиналари, санитария машиналари ва б.) га буриладиган Фаралар ҳам ўрнатилади. Баъзан Фара машина орқасига ҳам ўрнатилади (мас, тракторларда тиркамани ёки плугни ёритиш учун шундай қилинади).