SHAMPINYON (Agaricus) agarikadoshlar oilasiga mansub qalpoqchali zamburugʻlar turkumi; ekma qoʻziqorin. 60 ga yaqin turi maʼlum. Shampinyonning juft sporali (A. bisporus) turi keng tarqalgan boʻlib, maxsus nim qorongʻi, salqin va nam muhitda (harorat 20—25°, namlik 80 — 90%) soʻkchaklarda yetishtiriladi. Shampinyon qovurib, qaynatib (shoʻrva), dimlab yeyiladi, konserva qilinadi (q. Qoʻziqorin).