SKALPEL (lot. scalpellum — pichoqcha) — jarrohlik amaliyotida toʻqima va aʼzolarni kesishda ishlatiladigan kichikroq maxsus metall pichoqcha. Uz. 12—15 sm, kesadigan qismi kalta va dastasi uzunroqboʻladi. Skalpel kesuvchi yuzaning tuzilishiga qarab yassi qorinchali S, koʻz skalpeli, oʻtkir uchli S, toʻgʻri S, stomatologik Skalpel farq qilinadi. Hoz. lazer va ultratovush S. lari hamda «elektrskalpellar» mavjud. Skalpel oʻtkir, ushlashga qulay, oson tozalanadigan va sterillanadigan boʻlishi kerak.