SAYGʻOQLI DAVLAT BUYURTMA QOʻRIQXONASI (zakaznigi) – saygʻoklarni va ular koʻpayadigan hududlarni muhofaza qilish maqsadida 1991-y. da tashkil etilgan. Qoraqalpogʻiston Respublikasining Qoʻngʻirot tumanida, Ustyurt platosining shim. gʻarbiy qismida joylashgan. Qoraqalpogʻiston Respublikasi Tabiatni muhofaza qilish davlat qoʻmitasiga qaraydi. Mayd. 1 mln. ga. Buyurtmaxonaning sharqiy chegarasi Qozogʻiston Respublikasining davlat chegarasigacha, gʻarbiy chegarasi Aterov (Guryev) va Oqtoʻba viloyatlari chegaralariga qadar boradi. Ustyurtda yashaydigan saygʻoqlar Qoraqalpogʻiston hududining Ustyurt qismida koʻpayib, yozda Qozogʻiston choʻllariga koʻchadi, kuzda yana Ustyurtga qaytadi. Bu hududda Oʻzbekiston Qizil kitobiga kiritilgan tuvaloq va b. hayvonlar ham yashaydi. Buyurtma xududida saygʻoklarning umumiy soni 30 mingga yaqin (2003).