O‘zbekistondagi nodavlat oliy ta’lim muassasalari haqida ma’lumot bersangiz. Hozirgi paytda qaysi nodavlat oliy ta’lim muassasalarida abituriyentlardan hujjat qabul qilinmoqda?
Savolga Ta’lim sifatini nazorat qilish davlat inspeksiyasi Matbuot kotibi Shavkat Xo‘jaqulov AOKA huzuridagi shtabda bo’lib o’tgan brifingda javob berdi:
Yurtimizda nodavlat oliy ta’lim muassasalari salmog‘i yildan-yilga ortib bormoqda. Bugungi kunda yurtimizda faoliyat olib borayotgan oliy ta’lim muassasalari soni 15 taga yetdi.
Oliy ta’lim sohasida davlat xususiy sherikchilik tamoyili joriy etilib, 10 tadan ortiq nodavlat oliy ta’lim tashkilotlari faoliyatini yo‘lga qo‘yish bo‘yicha Vazirlar Mahkamasining tegishli qarorlari qabul qilindi. Joriy yilda oliy ta’lim muassasalariga qabul qilinayotgan talabalarning 10 foizga yaqini aynan nodavlat oliy ta’lim muassasalari hissasiga to‘g‘ri keladi.
Talabalarni o‘qishga qabul qilish tartibi nodavlat oliy ta’lim tashkilotlari tomonidan mustaqil belgilanadi. Shu jumladan o‘qishga hujjatlarni qabul qilish muddatlari ham.
Ta’lim inspeksiyasi tomonidan nodavlat oliy ta’lim tashkilotlarining rasmiy veb-sahifalari o‘rganilganda, hozirgi kunda Toshkent shahridagi Singapur menejmentni rivojlantirish instituti, TEAM universiteti hamda Farg‘ona shahrida Koreya xalqaro universitetlarida qabul jarayonlari davom etayotganligi ma’lum bo‘ldi.
Ushbu muassasalarga oliy ta’lim xizmatlari ko‘rsatish uchun Ta’lim inspeksiyasi tomonidan belgilangan tartibda litsenziyalar rasmiylashtirilgan.

Joylangan vaqt: 2022-08-27 21:48:29