СУД ЭКСПЕРТИЗА МАРКАЗИ, Хадича Сулаймонова номидаги Республика суд экспертиза маркази — Ўзбекистонда суд экспертизамҒ масалалари бўйича илмийметодик ва мувофиқлаштирувчи марказ. ЎзР Адлия вазирлиги ҳузурида дастлаб Тошкент и. т. криминалистика лаб. ташкил топган (1951). Унинг негизида Хадича Сулаймонова номидаги Тошкент суд экспертизаси и. т. институти ташкил қилинган (1958). Сўнг Республика и. т. криминалистика марказига (1995), кейин эса Суд экспертиза марказига айлантирилган (2003). Унинг фаолияти суриштирув, дастлабки тергов ва судлар топшириқларига асосан суд экспертизаларини ўтказиш, криминалистика ва суд экспертизаси соҳасида и. т. ларни амалга ошириш, ҳуқуқни муҳофаза қилиш идоралари ходимларига методик ёрдам кўрсатиш ва ҳуқуқбузарликларнинг олдини олишга қаратилган йўналишлар бўйича олиб борилади. Бу ерда 34 турдаги суд экспертизаси бажарилади. Марказнинг Тошкент ш. да ҳужжатларнинг криминалистика экспертизаси, суд баллистика ва изшунослик, судавтотехника, материаллар, ашёлар ва буюмлар криминалистика экспертизаси, одам ДНК сининг суд биологик экспертизаси, судиқтисодий экспертизаси, суд қурилиштехникавий ва суд фоноскопия экспертизаси лаб. ва бўлимлари, Андижон, Гулистон, Бухоро, Нукус, Самарқанд, Термиз, Фарғона, Урганч, Қарши шаҳарларида бўлинмалари бор. Марказ ходимларининг суд экспертизасининг назарияси, ўзбек тилидаги дастхатларни, имзоларни, ўқ отар к,уроллар билан етказилган жароҳатларни, наркотик моддалар ва доридармонларни, нефть маҳсулотларини, одам ДНК сини экспертиза қилиш бўйича ва шу каби илмий ишлари экспертиза амалиётида кенг қўлланади. Марказ олий юридик ўқув юртлари талабаларини ўқитиш ва ҳуқуқ соҳасидаги мутахассисларнинг малакасини оширишда фаол иштирок этади. Марказнинг илмий кутубхонасида суд экспертизасининг барча йўналишлари бўйича 15 мингдан ортиқ махсус адабиётлар бор. Илмий ишлар, қўлланмалар, эксперт тадқиқоти методларига оид китобларни нашр этади.