САДИЗМ, фаол алколагния (тиббиётда) — сексуал бузукликнинг бир тури; жинсий қониқиш, жинсий алоқа қилувчи шеригига жинсий яқинлик вақтида изтироб бериш ва жисмонан оғриқ етказиш билан ифодаланади. «Садизм» термини ўз асарларида кўплаб жинсий жиноятларни тасвирлаган француз ёзувчиси Маркиз де Сад (1740—1814) номидан олинган. Бундай садистик хатти-ҳаракатлар кўлами жуда кенг бўлиб, оддийгина руҳий изтироб беришдан жинсий алоқа қилаётган (партнёр) шерикларини ўлдириб қўйиш даражасигача етади. Садизмнинг олдини олишда жинсий тарбия ва жинсий бузуқликларга қарши кураш олиб боришнинг аҳамияти катта (қ. Жинсий жиноятлар). Кенг маънода Садизм — бировни азоблаб роҳатланиш, бировнинг озор чекишидан лаззатланиш.