ОЙСТРАХ Давид Фёдорович [1908.17(30). 9, Одесса – 1974.24.10, Амстердам; Москвада дафн этилган] — скрипкачи, педагог, дирижёр; замонавий рус скрипка ижрочилик мактаби асосчиларидан. Лондон (1959), Бостон, Рим, Берлин (1961) санъат ва мусиқа академиялари фахрий аъзоси, Кембриж ун-ти проф. (1969). Одесса мусиқали драма ин-тини тугатган (1926). Москва филармонияси якка созандаси (1932—34 ва 1941 й. дан), Москва консерваториясида доцент (1934 й. дан), проф. (1939 й. дан), кафедра мудири (1950 й. дан). Услубига мукаммал ижро маҳорати, теран мазмун, бадиий-гоявий равшанлик хосдир. Ниҳоятда кенг репертуаридан мумтоз ҳамда замонавий скрипка асарлари ўрин олган. Чет эл мамлакатлари, хусусан, Ўзбекистонда гастролда бўлган. Бир нечта халқаро танловлар ғолиби (Ленинград, Варшава, 1935; Брюссель 1937). Ўғли — Игорь О. (1931) ҳам машҳур скрипкачи ва дирижёр. Россия халқ артиста (1986). Москва филармонияси якка созандаси (1958 й. дан).