НАБИС (Nabis) (? – мил. ав. 192) – Спарта ҳукмдори (тирани) (мил. ав. 207—192). Еврипонтийлар шоҳ хонадонига мансуб бўлган. Бир қанча қатъий тадбирларни амалга оширган: бир кисм мулкдорларни қувғин қилган, айримларини қатл этган; йирик ер эгаларининг ерларини мусодара қилиб, гражданлик таркибига киритилган ерсиз спартиатлар ва илотларга бўлиб берган. Набис даврида Спарта қўшини кучайган, Аргос босиб олиниб, у ерда ҳам шу ислоҳотлар ўтказилган. Бутун Пелопоннес бўйича туб ислоҳотлар ўтказилиши хавфи Набисга карши Ахей иттифоқинмнг уруш бошлашига сабаб бўлган. Иттифоқчиларга ёрдамга Рим армияси хам етиб келган. 195 й. тузилган сулҳга кўра, Набис ҳокимияти фақат Спарта ҳудуди билан чеклаб қўйилган. Набиснинг кайтадан уруш қилиши унинг ҳам қуруқликда, ҳам денгизда мағлубиятга учраши билан тугаган. Набис хоинона ўлдирилиб, Спарта Ахей иттифоқига қўшиб олинган.