ҲАКИМОВ Хожи Акбарович (1909.15.5 — Тошкент — 2001.23.11) — хирург, гематология ва трансфузиология хизмати ташкилотчиларидан. Ўзбекистонда хизмат кўрсатган фан арбоби (1969), Ўзбекистонда хизмат кўрсатган врач (1944). Тиббиёт фанлари номзоди (1959). Ўрта Осиё тиббиёт ин-тини тугатгач (1933), шу ин-т хирургия клиникасида ординатор (1933—37), Оҳангарон туман шифохонаси бош врачи (1937—38), Тошкент вилояти Соғлиқни саклаш бўлими бошлиғи (1938—39), Соғлиқни сақлаш халқ комиссари ўринбосари (1939—40), уруш қатнашчиси (1941—45), 1946 й. дан республика соғлиқни сақлаш вазири муовини. Ўзбекистон гематология ва қон қуйиш и. т. инсгитути директори (1961 — 84), 1985 й. дан илмий маслаҳатчи.
Илмий фаолияти гематология ва қон қуйиш масалаларига оид.