JANUBI-SHARQIY OSIYO DAVLATLARI UYUSHMASI (ASEAN) – regional siyosiy-iqtisodiy tashkilot. Indoneziya, Malayziya, Singapur, Tailand va Filippin davlatlari tarkibida tuzilgan (1967). Keyinchalik unga Bruney va Vyetnam qabul qilingan. Maqsadi — mazkur davlatlarning iqtisodiy, ijtimoiy, madaniy va siyosiy hamkorligini rivojlantirish, Janubi-Sharqiy Osiyoda tinchlik va barqarorlikni oʻrnatishga koʻmaklashish. Tashkilot soʻnggi yillarda regionda tinchlik va betaraflik zonasi, shuningdek, yadrosiz zona vujudga keltirish yoʻlida harakat qilmoqda. Qarorgohi — Jakarta (Indoneziya)da.