2020 yilning 25 sentabr kuni Davlat ekologiya qo‘mitasi tomonidan Xalq ta’limi vazirligiga 2000 dona «O‘zbekiston qizil kitobi»ni beg‘araz taqdim etishga bag‘ishlangan uchrashuv bo‘lib o‘tdi.
Uchrashuvni o‘tkazishdan ko‘zlangan asosiy maqsad bugungi kunda ulg‘ayib kelayotgan yosh avlodning ekologik ta’limi, madaniyatini oshirish, atrof tabiiy muhitga ehtiyotkorona munosabatda bo‘lish hissini shakllantirishi uchun Davlat ekologiya qo‘mitasi hamda tegishli vazirlik va idoralar tomonidan hamkorlikda chop etilgan «O‘zbekiston Qizil kitobi»ni Xalq ta’limi vazirligiga beg‘araz 2000 dona taqdim etishdan iborat.
Davlat ekologiya qo‘mitasi raisining birinchi o‘rinbosari Narzullo Oblomuradov tadbirni o‘tkazishdan ko‘zlangan maqsadga to‘xtalar ekan, yangi chop etilgan «O‘zbekiston Qizil kitobi» va redbook sayti o‘quvchilar o‘rtasida ekologik madaniyatini oshirishga xizmat qilishini ta’kidladi.
Xalq ta’limi vazirining birinchi o‘rinbosari Usmon Sharifxodjayev ta’lim tizimida ekologik tarbiyaning o‘rni hamda joriy yilda mazkur yo‘nalishda ta’lim mazmuniga kiritilgan yangiliklar to‘g‘risida yig‘ilish qatnashchilariga ma’lumot berdi.
“Joriy yil yangi yaratilgan 5-sinf «Biologiya» darsligiga «Tabiatni muhofaza qilish» mavzusi kiritilgan bo‘lib, unda «Muhofaza qilinadigan hududlar» va «Qizil kitob» haqida ma’lumot berildi. Mazkur mavzuda «Qizil kitob»ni O‘zbekistonda birinchi marta qachon ta’sis etilganligi va u nima uchun xizmat qilishi to‘g‘risidagi ma’lumotlar hamda kitobga kiritilgan o‘simlik va hayvonlardan misollar rasmlar asosida keltirildi. Darslikka ilk bor 2009 yil va 2019 yilda nashr etilgan «Qizil kitob» to‘g‘risidagi ma’lumotlar videorolik tarzida tayyorlanib, QR-kod shaklida mavzuga joylashtirildi.
Ekologik ta’lim-tarbiyaning bugungi kun uchun ahamiyatini inobatga olgan holda ilk bor yangi tashkil etilgan «Tarbiya» darsligining har bir bosqichiga o‘quvchilarda ekologik madaniyatini oshirishga xizmat qiluvchi mavzular singdirildi”, — deya ta’kidladi Xalq ta’limi vazirining birinchi o‘rinbosari.
Shuningdek, tadbir davomida yig‘ilish ishtirokchilariga Davlat ekologiya qo‘mitasi mutaxassisi Alisher Yunusov tomonidan «O‘zbekiston Qizil kitobi» taqdimot qilindi. Uchrashuv so‘ngida Davlat ekologiya qo‘mitasi tomonidan olib kelingan 2000 dona «O‘zbekiston Qizil kitobi»ni tantanali topshirish marosimi bo‘lib o‘tdi.

Joylangan vaqt: 2022-08-27 21:49:08