КВЕБЕК — Канаданинг шарқий қисмидаги провинция. Майд. 1540,7 минг км2. Аҳолиси 7,4 млн. киши (2001), асосан, канадалик французлар. Маъмурий маркази — Квебек ш., энг катта шаҳри — Монреаль. К. нинг кўп қисми Лабрадор я. о. да жойлашган, жан. да Аппалачи тоғларининг тармоқлари (бал. 1311 м гача) жойлашган, Сан-Лаврентий даре водийси пасттекисликдан иборат. Квебекнинг шим. тундра, ўрта ва жан. кисми ўрмон. Янв. нинг ўртача т-раси шим. да —24° дан жан. да —10° гача, июлники 11—21°, йиллик ёғин 500—1000 мм.
Квебек — иқтисодий жиҳатдан ривожланган провинция, электр ст-яларнинг умумий қуввати жиҳатдан ва алюминий и. ч. да мамлакатда етакчи ўринда. Темир, мис, полиметалл, олтин, кумуш, никель, асбест конлари бор. Канадада олинаётган асбестнинг аксари қисми Квебекда қазиб олинади. Нефтни қайта ишлаш, машинасозлик, тўқимачилик, мўйна, кўн пойабзал, озиқ-овқат, целлюлоза-қоғоз саноати ривожланган.
Қ. х. нинг етакчи тармоғи — сут чорвачилиги. Паррандачилик ҳам ривожланган. Ички ва ташқи сув ҳавзаларида балиқ овланади. Саноат марказлари ва портлари: Монреаль ва Квебек. Квебекнинг ҳоз. ҳудудида европаликлар келгунга қадар индейс ва эскимос (шим. қисмида) қабилалари яшаган. Квебекни дастлаб (1608) французлар эгаллаган. Етти йиллик уруш (1756—63) дан сўнг Буюк Британия қўлига ўтди. 1774 й. да Квебек номини олди. 1867 й. дан Канада провинцияси. Квебекнинг чегараси 1898 ва 1912 й. ларда шим. га томон анча кенгайди.