КОХ (Koch) Роберт (1843. 11.12, Клаусталь — 1910.27.5, Баден-Баден) — немис микробиологи. Эпидемиология ва бактериология асосчиларидан бири. Гёттинген ун-тини тугатган (1866). Берлин ун-ти проф. (1885—91). Берлиндаги юқумли касалликлар ин-ти директори (1891-1904; ҳоз. ин-тунинг номи билан юритилган). Асосий ишлари юқумли касалликларни қўзғатувчи микроорганизмларни аниқлаш ва уларга қарши кураш усулларини ишлаб чиқишга оид. Миср, Ҳиндистон, Янги Гвинея ва Ява о. га микробиологик экспедициялар ташқил этган. Куйдирги, сил(1882), вабони (1883) қўзғатувчи микроорганизмларни кашф этган. Бактериал тадқиқотлар олиб борган. Дезинфикация усулларини таклиф этган. Туберкулин препаратини топган (1890). Нобель мукофоти лауреати (1905).