КОНТРАТАКА (франц. contreattaque) , қарши ҳужум — жанг олиб бораётган ёки мудофаада турган қўшин қисмлари томонидан уларнинг сафларини бузиб анча ичкарига суқилиб киришга муваффақ бўлган душман кучларига қарши, уларни тор-мор этиш, илгари қўлдан бой берилган тактик вазиятни қайта тиклаш мақсадида амалга ошириладиган шиддатли қарши ҳужум. Контратака мудофаада турган қўшинлар фаоллигини белгиловчи жиҳат бўлиб, аксар ҳолларда иккинчи қатордаги ҳамда заҳирада турган ҳарбий кучлар иштирокида ўтказилади. Қайта ҳужумга ўтган қисмлар қўшинда мавжуд жанговар ўт очиш қуроллари томонидан қўллаб-қувватланиб туради. Ўз заҳира қисмларини берилган зарбани янада мустаҳкамлаш учун ташлашга улгурмаган ғаним кучларига нисбатан кучли ҳамла қилиш кўп ҳолларда Контратаканинг муваффақиятини таъминлайди.