КЎҲИРУД — Эрондаги тоғ тизмаси, Ўрта Эрон тоғлари таркибида. Шим.ғарбдан жан.-шарққа томон 900 км га чўзилган, бал. 2—3 минг м, энг баланд жойи Хазар вулкани — 4420 м. Асосан, чўкинди ва вулканоген қатламлардан тузилган. Йилига тоғ олдиларида 100 мм дан, тоғларда 300 мм гача ёғин ёғади. Тоғ чўли ва чала чўли, юқори минтақаларда тоғ дашти ландшафти устун. Дараларда ёнғоқзорлар бор. Яйлов чорвачилиги ривожланган, водийларда унча катта бўлмаган воҳалар учрайди.