КОГЕЗИЯ (лот. cohaesus — ёпишган, бириккан) — бир хил жинсли қаттиқ ёки суюқ жисмларнинг молекулалараро таъсирлашуви натижасида яхлит жисм бўлиб бирикиши. Молекулалараро масофа ошган сари К. кучи кескин камаяди, у газларда жуда кичик, қаттик жисмларда етарлича катта. Когезия жисмнинг мустаҳкамлигини ифодалайди. Қаттиқ жисм парчаланганда (бурғиланганда, майдаланганда) ёки суюқликлар сочилганда, Когезияга тескари жараён содир бўлади (қ. Адгезия).