КОБЕ, Кобэ — Япониядаги шаҳар. Хонсю о. нинг жан.-ғарбий қисмида. Осака қўлтиғи соҳилида. Хиого префектурасининг маъмурий маркази. Аҳолиси 1,5 млн. киши (1990-й. лар охири). Муҳим т. й. тугуни. Япония ғарбидаги йирик саноат маркази. Металлургия, транспорт машинасозлиги, жумладан, кемасозлик (мамлакатда қурилаётган кемалар ҳажмининг 1/3 қисми Кобе ҳиссасига тўғри келади), озиқ-овқат ва ҳарбий саноат корхоналари бор. Электр энергия, тўқимачилик ва кимё саноати маҳсулотлари ишлаб чиқарилади. Кобе порти Япониядаги энг йирик портлардан бири (йиллик юк ортиб-тушириш 150 млн. т.). Метрополитен қурилган. Кобеда чет эл банкларининг йирик филиаллари, савдо ва саноат фирмалари жойлашган. Ун-т, олий тижорат ин-ти, тех. коллежи, расадхона, бадиий музей мавжуд. Кобе — халқаро туризм марказларидан бири. Шаҳар атрофида курортлар ва миллий боғлар бор.