КЛЕОПАТРА (юн. Kleopatra) (мил. ав. 69 — Искандария — мил. ав. 30) — Мисрнинг птолемейлар сулоласидан бўлган сўнгги подшоҳи, Птолемей XI нинг қизи. Клеопатра ўз укаси Птолемей XII Дионисга турмушга чиқиб, у билан биргаликда давлатни идора қила бошлаган (51 й. дан) бўлсада, якка ўзи тахтга эгалик қилиш учун зимдан кураш олиб борган, нияти фош бўлгач, Сурияга сургун қилинган (48 й.). Аммо, Клеопатранинг билимдонлиги, ақлзаковатига мафтун бўлиб қолган Юлий Цезарь 47 й. уни Мисрга қайтарган (К. ундан Цезарион исмли ўғил кўрган). Цезарь ўлдирилгач, К. Марк Антонийнинг иттифоқчиси ва маъшуқаси (37 й. дан хотини) бўлган. 31 й. Октавиан (қ. Август) қўшинлари Мисрни забт этгач, Антоний ва Клеопатра ўзларини ўлдиришган. Нақлга кўра, угла даврдаги мисрликлар эътиқодига асосан абадий барҳаётликка эришмоқ учун ўзини заҳарли илонга чақтирган.
Клеопатра тимсоли Ғарб (У. Шекспир, Б. Шоу, Д. Тьеполо, П. Рубенс ва б.) ҳамда Шарқ (А. Шавқий ва б.) адиб, шоир, драматург, рассом ва ҳайкалтарошлари асарларида акс этган, унга бағишлаб фильмлар яратилган.