КИНОТЕЛЕВИЗИОН ТЕХНИКА — тасвирларни суратга олиш, монтаж қилиш ва ўзатиш учун кино ва телевидение воситаларидан фойдаланиладиган усуллар мажмуи. Кино ва телевидение воситалари деганда кинотехника, телевидение ва видеоёзув воситаларининг уйғунлашуви тушунилади. Ушбу йўналишларни ўз ичига олади: телевизион фильмларни тўғридан-тўғри кинога олиш; телевизион тасвирларни кинескоп экранидан ёки бевосита электрон нурли камера ёрдамида ёзиб олиш; видеоназорат қурилмаси (монитор) ва назорат видеоёзувидан фойдаланган ҳолда кинога олиш; кинофильмларни монтаж қилиш ва кўпайтиришда телевидеоназоратдан фойдаланиш; телекинопроекциялаш (кинолентага туширилган фильмларни телевидение орқали ўзатиш).
Маълумки, кинотехника 19-а. 80-й. ларидан, телевидение асосан 20-а. бошларидан, видеоёзув 20-а. 50-йилларидан ривожлана бошлаган ва аста-секин такомиллаштириб борилган. Айниқса, видеофильм яратиш расм бўлганидан (Ўзбекистонда 20-а. 70-й. ларидан) сўнг Кинотелевизион техниканинг аҳамияти янада ортди. Кинотелевизион техникада кўп (икки ва ундан ортиқ) кинокамерали кинотелевизион жиҳозлар ва б. ўзига хос усуллардан фойдаланилади. Кинокамераларнинг ҳар қайсисига ихчам телеузатиш камераси ҳам бириктирилган бўлади.
Кинотелевизион техника воситасида бевосита кинолентага суратга олинган кинофильмларни ҳам, видеомагнитлентага туширилган видеофильмларни ҳам, бевосита олинадиган «жонли» тасвирларни ҳам телевидение орқали намойиш қилиш мумкин.
Умуман телевизион тасвирларни кинолентага туширишнинг оптик, электрон нурли ва лазерли усуллари мавжуд. Оптик усулда суратга олиш қурилмаларида тасвирларни кинескоп экранидан кўчириш мумкин. Электрон нурли усулда суратга олиш қурилмаларида видеосигнал ўзгартириб юборадиган электрон нур ҳавоси сўриб олинган (вакуум) камерада ҳаракатланаётган кинолентага тўшади. Вакуум камера электрон нурли прожектор, лента тортиш механизми ва вакуум ҳосил қилувчи қурилмадан иборат бўлади. Рангли тасвирни лазер нур ёрдамида 35 мм ёки 16 мм ли лентага ёзиб оладиган қурилма ҳам мавжуд. Ҳозир Кинотелевизион техника соҳасида компьютерлар техникасидан унумли фойдаланилади. Кинотелевизион техника воситаларидан мураккаб кинога олишда, мультфильмлар ишлашда, кассетали кинони суратга олишда, махсус дастурларни тайёрлаш ва б. да фойдаланилади (яна қ. Кинотехника).