КИНДАКЛИТЕПА — Ўзбекистоннинг жан. даги қад. қишлоқхаробаси (мил. ав. 4 — мил. 6—7-а. лар). Қашқадарё воҳасининг ўрта қисмида, Қорабоғ қишлоғи яқинида. Мазкур қишлоқ харобаси ўзи жойлашган тепалик (бал. 12 м, майд. 0,25 га) нинг шаклига кўра шундай ном олган. 1955—57 й. ларда Қашқадарё археология-топография экспедицияси (раҳбари В. Д. Жуков) бу ерда қазиш ишлари олиб борган. Археологик тадқиқотлар вақтида маданий қатламлар орасида пухта қилиб қурилган бир қанча тўртбурчак шаклдаги иншоотлар қолдиклари (тарҳи 5,87×6,65 м, 6×7,5 м, 5×5,4 м) борлиги аниқланди. Сақланиб қолган деворларнинг бал. 0,7 м дан 3 м гача, қалинлиги 1,4 м дан 1,7 м гача бўлиб, баъзилари хом ғишт (54x32x11 см3, 47x27x9 см3, 58x32x9 см3, 25×10 см3) ва баъзилари пахсадан қурилган. Киндаклитепадан сопол идишлар синиқлари, кўза ва хумлар, козон ва ўчоқлар, суяк, тош, мис, темир ва шишадан қилинтан буюмлар, чироқдонлар, ўғир ва ёрғучоқлар, сопол муҳр ва тугмалар, урчуқ ҳамда тўқувчилик дастгоҳларида ишлатиладиган конуссимон, биконуссимон ва ясси юк тошлари ҳамда кулолчилик дастгоҳлари бўлаклари топилди. Урчуқ ва тўқув дастгохларида ишлатиладиган юк тошлари тўқувчилик Киндаклитепа аҳолисининг асосий машғулотларидан бири бўлганлигини кўрсатди. Мазкур ашёвий далиллар ва и. т. лар натижасида Киндаклитепа аҳолисининг ўтроқ тарзда ҳаёт кечириб, деҳқончилик ва ҳунармандчилик билан машғул бўлганлиги ҳамда кейинчалик сув танқислиги оқибатида бу ерни тарк этганлиги аниқланди.