КИМ Борис Александрович (1922. 10.10, Владивосток — 1996.3.6, Бухоро) — театр рассоми. Ўзбекистон халқ рассоми (1970). П. Беньков номидаги Республика рассомлик билим юртини тугатган (1956). 1965 й. дан Бухоро театрида бош рассом. К. ижоди ҳар бир спектаклнинг руҳига мос таъсирчан муҳит яратиши билан диққатга сазовор. «Майсаранинг иши» (1949, Ҳамза), «Уйланиш» (1952, Н. Гоголь), «Алишер Навоий» (ҳамкорликда, 1952, Уйғун ва И. Султон), «Суймаганга суйканма» (1957, С. Хўжаниёзов), «Ватан ишқи» (1958, 3. Фатхуллин, Ш. Саъдулла), «Ҳамлет» (1968, У. Шекспир), «Ревизор» (1976, Н. Гоголь), «Келин ва куёв» (1977, М. Байжиев), «Лайли ва Мажнун» (1978, Хуршид), «Мукофот» (1979, А. Гельман), «Гули сиёҳ» (1984, С. Жамол) ва б. спектаклларга декорациялар, тарихий ва маиший либослар яратган.