КИЧИК ОСИЁ ЯРИМ ОРОЛИ — Осиёнинг ғарбий қисмидаги ярим орол. Қора, Мармар, Эгей ва Ўрта денгизлар ҳамда уларни бирлаштириб турган бўғозлар билан чегараланган. Майд. 506 минг км2. Ўз. 1000 км дан кўпроқ, кенглиги 400—600 км. Ярим оролнинг денгиз бўйидаги камбар пасттекисликдан ташқари ҳамма қисми тоғлик. Шим. ва жан. қирғоқлари текис, ғарбий қирғоғи нотекис, орол кўп. Ярим оролнинг катта қисми Кичик Осиё тоғлигидан иборат. К. О. я. о. нинг марказий қисмида чала чўл ландшафтли Анадолу ясситоғлиги жойлашган. Энг баланд жойи — сўнган Эржиёс вулкани (3916 м). Ярим оролнинг шим. ва ғарбий қисмида зилзилалар бўлиб туради. Карст рельеф шакллари кенг тарқалган. Иқлими субтропик ўрта денгиз иқлими, шарққа томон қурғоқлашиб боради. Йиллик ёғин чекка қисмидаги тоғларда 1000—3000 мм, ички р-нларда 200—500 мм. Дарёлари камсув, қишда тўлиброқ оқади. Оқмас кўл ва шўрхок кўп. Чала чўл ва дашт ўсимликлари ўсади, ўрмонлар учрайди. Кичик Осиё Ярим Оролида Туркия ҳудудининг катта қисми жойлашган.