КЕНГ ЭКРАНЛИ КИНО — кинофильмлар кенг экранда намойиш қилинадиган кинематография тури. Фильмни суратга олиш ва намойиш этишда анаморфот оптикадан фойдаланилади, бунда тасвир горизонтал торайтириб кинога олинади ва экранга ёйиб проекцияланади. Турли мамлакатларда Кенг экранли кинонинг ҳар хил тизимлари ихтиро қилинган. Ҳоз. рангли ва стереофоник овозли Кенг экранли кино 1953 й. да яратилган. Овоз 3 каналга стереофоник ёзиб олинади, фильм нусхалари 35 мм ли киноплёнкага туширилади. Кенг экранли кино кино санъатининг тасвир имкониятини анча кенгайтиради. Ўзбекистонда 2000 га яқин кенг экранли кинотеатр ишлаб турибди (2002).