КАРТОШКА НЕМАТОДАСИ (Hetero dea rostochiensis) — юмалоқ чувалчанглар оиласига мансуб паразит чувалчанг. Танаси чўзиқ, икки учи ингичка, аввал оқ, кейинроқ сариқ, охири жигарранг бўлади. Вояга етгани 1,1 — 1,2 мм, эркаги урғочисидан кичикроқ. Тухумдан чиққан личинкаси 250 мк. Асосан, картошка туганагини зарарлайди. Зарарланган уруғликдан кўкариб чиққан поянинг пастки қисми (ердан 10 см гача бўлган қисми) ёрилиб, яраланади, остки барглар сарғаяди, сўлиб, тўкилади, ҳосили камаяди. Картошка сақланаётган омбор ҳарорати 5° дан ошиб кетса, картошкадан нематода тухум қўйиб кўпаяди, бунда картошка пўсти ёрилади, личинкалар соғлом картошкани зарарлайди, натижада кўп картошка чириб кетади. Кураш чоралари: ташқи ва ички карантин; алмашлаб экиш; кузда картошка экиладиган майдонларга нематицидлар (гетерофос, тиазон, карбатион) солиш.