КАРТОШКА ЭККИЧ — униб чиққан (куртаклар чиқарган) ва унмаган уруғлик картошка доналарини оддий усулда қаторлаб экишга, айни вақтда жўякларни очишга мўлжалланган машина. Бункер, экиш аппаратлари, картошкани тупроққа кўмувчи ва жўяк очувчи иш органлари, таянч ғилдираклардан иборат. Иш вақтида бункердаги уруғлик картошкани чўмичли аппарат олиб, сошникка ташлайди. Сошникдан тушган картошкани уруғ кўмувчи аппаратлар кўмиб, 70 ёки 90 см ли жўяк очиб кетади. Картошка эккичнинг картошкани экиш билан бир вақтда ўғит солиб кетадиган олти, саккиз қаторли хиллари хам бор. К. э. 40 — 70 кВт қувватли тракторларга агрегатланиб ишлатилади. Ўзбекистонда «Ўзқишлокхўжаликмашхолдинг» компанияси 2 ва 4 қаторлаб экадиган КС-2 ва КС-4 русумли машиналарни ишлаб чиқаради. Иш унумдорлиги: КС-2 — 0,63 га/соат ва КС-4 – 1,28 га/соат.