КАРИМОВ Шавкат Иброҳимович (1943.21.6, Тошкент) — хирург олим. Ўзбекистон ФА акад. (1996), Ўзбекистонда хизмат кўрсатган фан арбоби (1993), тиббиёт фанлари д-ри (1981), проф. (1983). ТошТИ ни тугатган (1966). ТошТИ хирургия кафедраси изланувчиси, ассистенти ва доценти (1969 — 76), Кардиология и. т. институти илмий ишлар бўйича директор муовини (1976— 79), 1979 й. дан ТошТИ госпиталь ф-т хирургияси кафедраси мудири. Ўзбекистон Республикаси Соғлиқни сақлаш вазири (1991—98), «Ўзбекистон тиббиёт журнали» бош муҳаррири (1991—98). Каримовнинг илмий ишлари аорта ва қон томир касалликлари, жигар циррози ва механик сариклик, эндоваскуляр ва эндобилиар жарроҳлик, ўткир перитонитнинг оғир асоратлари, ўпка ва плевранинг ўткир ва сурункали, шунингдек, жадал жарроҳлик касалликлари, қандли диабетни хирургик усулда даволашни такомиллаштиришга оид.
Нью-Йорк (1995), Калифорния (1996) академияси, Россия тиббиёт ФА (2001) акад. Гепатопанкреатодуоденал хирургия Европа ассоциацияси (1987), Н. И. Пирогов номидаги хирурглар ассоциацияси (1996), Россия Гепатологлар хирургияси ассоциацияси (2000) аъзоси.
Ас: Медико-социальные аспекты семейно-брачных отношений в Узбекистане, Т., 1995; Охрана репродуктивного здоровья женщин в Республики Узбекистан, Т., 1996; Здравоохранения Узбекистана. Проблемы и перспективы, Т., 1998; Экстрагенитал касалликлар ва ҳомиладорлик. (А. Г. Гадоев билан ҳамкорликда), Т., 1998.