КАЛЬВИН (Calvin, Calvinus) Жан (1509.10.7, Нуайон, Франция — 1564.27.5, Женева) — Францияда Реформация намояндаларидан бири, кальвинизм асосчиси. Руҳоний оиласида туғилган. Диний ва юридик маълумот олган. М. Лютер таъсирида протестантизмга мойил бўлган. 1534 и. протестантлар Францияда таъқиб этилгач, Женевага келди. 1541 й. Женеванинг диктатори (шаҳар ҳокими) бўлгач, ўз таълимотини амалга оширишга интилди. «Христиан динидаги кўрсатмалар» асарида (1536) кальвинизм асослари ифода этилган. Қадимги аҳдни христианлик ҳақиқатининг ягона манбаи деб ҳисоблаган. Черков ва жамият хаётида худога эътиқод қилишни тарғиб этиш Кальвин фаолиятининг асосини белгилайди. Кальвин ўта диний муросасизлиги билан ажралиб турган. У ўз таълимотини Франция, Англия, Нидерландия, Германия, Венгрия ва Польша мамлакатларига тарқатди.