КАККУ, оддий какку (Cuculus canorus) — каккусимонлар туркумига мансуб қуш. Танасининг уз. 33—38 см, оғирлиги 100 г гача. Қаноти калта, думи узун. Пати кўнғир кулранг ёки қўнғир сарғиш, қорин томони оқиш бўлиб, қорамтир йўл-йўл. Европа ва Осиёнинг ўрта ва жан. ҳудудларида кенг тарқалган. Учиб кетадиган қушлардан. Уя қурмайди, тухумини чумчуқсимонлар уясига ташлаб кетади. Шунинг учун Какку чумчуқсимонлар уя қурадиган деярли барча биотопларда тарқалган. Ўзбекистоннинг ҳамма дарахтзорларида учрайди. Май — авг. ойларида 12—25 та тухум қўяди. Тухумдан очиб чиққан Какку жўжаси уя эгасининг тухумларини уядан чиқариб ташлайди. Бошқа қушларнинг уясини бузиши туфайли Какку бирмунча зиён етказади. Ҳашаротлар ва уларнинг куртлари, шу жумладан, бошқа қушлар тегмайдиган пахмоқ қурт (тенгсиз ипак қурти) билан озиқланиб, фойда келтиради.