КАДМИЙ СУЛЬФИД, CdS — сариқ ёки қизил рангли кристаллар. Гексагонал ва кубсимон модификациялари маълум. Суюқланиш т-раси 1475°, зичлиги 4,824 г/см3, яримўтказгич. Сувда эримайди, концентрланган НС1, HNO3 ва H2SO4 таъсирида парчаланади. Кадмий ва олтингугурт буғларини ўзаро таъсир эттириш, эритмадан водород сульфид ёки натрий сульфид иштирокида чўктириш, кадмий ва олтингугурт органик бирикмаларни ўзаро таъсир эттириш усуллари билан олинади. Кадмий сульфид яримўтказгич лазерларда фаол муҳит, фотоэлементлар тайёрлашда хом ашё, қуёш батареялари, фотодиодлар, люминофор, шиша, сопол ва бадиий бўёқлар тайёрлашда пигмент сифатида қўлланади. Табиатда гринокит минерали кўринишида учрайди.