ДЎРМОНТЕПА — қад. шаҳар харобаси (мил. ав. 3-а. — 13-а. боши). Самарқанддан 2 фарсах (12—14 км) нарида, Пастдарғом туманида. Умумий майд. 25 га. Икки қисм — шаҳристон I (арк б-н бирга) ва шаҳристон II дан иборат. Шаҳристон I нинг майд. 16 га, шаҳристон II ники 6 га бўлиб, арк тарҳи 115×110 м ни ташкил этади. Д. Самарқандни Бухоро билан боғлаган Буюк ипак йўлида жойлашган ва савдо карвонлари учун муҳим қўнимгоҳ вазифасини ўтаган. Тарихчи ва археологлар уни ўрта аср ёзма манбаларида қайд этилган Хохсар (Ёқут алҲамавий асарларида — Ал-Хохасро) деб қисоблашади. Дўрмонтепа 13-а. бошида мўғуллар томонидан вайрон қилинган.