«ДАЙМЛЕР-БЕНЦ AT» — етакчи немис автомобиль концерни. 1926 й. да Готтлиб Даймлер ва Карл Бенц томонидан Германиянинг Штутгарт ш. да ташкил этилган. Асосан енгил ва юк автомобиллари, оғир юк тортувчи тягачлар, кичик ва катта йўловчи автобуслар, микроэлектроника, авиааппаратлар, авиадвигателлар ва б. ишлаб чиқаради. Мерседес-Бенц АГ (енгил ва юк автомобиллари и. ч., савдо ва автосервис), Даймлер-Бенц Индустри — «АЕГ» (микроэлектроника, дизель куч агрегатлари, автоматлаштириш учун техника, телемеханика воситалари ва б.), Даймлер-Бенц Аэроспэйс — «Даза» АГ (авиация, космонавтика, ҳарбий ва фуқаро сунъий йўлдошлари тизими ва б.) ва Даймлер-Бенц Интер Сервис — «Дебис» (молиявий хизматлар кўрсатиш, сугурта, маркетинг хизмати, коммуникация ва алоқа хизмати, халқаро савдо, кўчмас мулк менежменти) компаниялари концерн таркибига киради. Бразилия, Аргентина, АҚШ, Хитой, Туркия, Испания, Италия сингари дунёнинг 23 давлатида ўз корхоналарига эга.
1993 й. «Мерседес-Бенц АГ» компанияси билан ҳамкорликда Ўзбекистонда юк автомобиллари ишлаб чикарадиган «Хоразм ишлаб чиқариш бирлашмаси» қўшма корхонаси ташкил этилди. 1996 й. Тошкент ш. да «Д.-Б. АГ»нинг Мар-казий Осиё бўйича ваколатхонаси очилди. 1998 й. «Д.-Б. АГ» Американинг гигант корпорацияси «Крайслер» билан қўшилиши натижасида дунё автомобилсозлигида етакчи компания «Даймлер-Крейслер» ташкил этилди. Йиллик савдо обороти 124 млрд. немис маркаси. «Д.-Б. АГ»нинг дунё бўйича корхоналарида 300 мингдан ошиқ ишчи-хизматчи ишлайди (1998).
Ҳамид Азизқориев.