ДАЛМАЦИЯ ОРОЛЛАРИ — Адриатика денгизидаги архипелаг, Болқон я. о. қирғоқлари яқинидаги 1000 дан ортиқ катта-кичик (Крк, Брач, Црес, Хвар, Корчула, Вис ва б.) ороллардан иборат. Майд. 2500 км2. Хорватия таркибида. Далмация ороллари қурукликни денгиз суви босиши натижасида вужудга келган. Далмация ороллари оҳактошлардан тузилган, карст кенг тарқалган. Пасттоғлар (500—700 м) кўп. Қиш ойларида ўртача т-ра 5°, ёзда эса 20—25°. Йиллик ёғин 500—1000 мм, асосан қиш ва кузда ёғади. Далмация оролларига Ўрта денгиз типидаги ўсимликлар хос. Тоғ ён бағирларида ва водийларда узум, зайтун ва цитрус мевалар етиштирилади. Қўй боқилади ва балиқ овланади. Туризм ривожланган. Корнат ва Млет миллий парклари ташкил этилган.