ДАКАР — Сенегал пойтахти. Ғарбий Африканинг муҳим саноат, транспорт ва савдо-молия марказларидан. Яшил Бурун я. о. да, муҳим денгиз йўллари кесишган ерда жойлашган. Иқлими субэкваториал; янв. нинг ўртача т-раси 22°, июлники 28°. Йиллик ўртача ёғин 572 мм. Аҳолиси 2 млн. киши (1998), 90% африкаликлар; европаликлардан асосан французлар яшайди.
Дакарни 1857 й. да французлар қалъа сифатида бунёд этган. 1895—1960 й. ларда Франция мустамлакаси Сенегалнинг, 1904—59 й. ларда Франция Fapбий Африкасининг маъмурий маркази. 1960 й. дан Сенегал пойтахти.
Дакар ва унинг атрофида мамлакат саноат корхоналарининг 80% жойлашган. Саноат корхоналари асосан қ. х. маҳсулотларини қайта ишлайди. Дакарда ер ёнғоқ ёғи ишлаб чиқарувчи йирик з-длар мавжуд. Балиқ консерва, пиво ва ун з-длари, тамаки, гугурт, йигирув ва тўқимачилик ф-калари, кемасозлик, нефть, цемент, совун ва кимё корхоналари, иссиқлик электр ст-яси бор. Йирик денгиз порти. Дакар орқали четга ер ёнғоқ ва унинг ёги, фосфат чиқарилади. Аэропорти халқаро аҳамиятга эга. Дакарда ун-т (1950), политехника ин-ти, Африкани ўрганиш ин-ти, Пастер ин-ти, санъат мактаби, ун-т кутубхонаси, музейлар, театр, ҳайвонот боғи ва б. бор.